UKA 2001/78

 

Siunnersuummut nassuiaatit

 

Nalinginnaasumik nassuiaatit

Aningaasarsiaqartitsinermut inatsit atuuttoq 1993-imeersoq taamanili allanngortinneqanngilaq. Inatsisartuni Naalakkersuisuniluunniit ilaasortatut qinigaaneq inatsisip akuersissutigineqarneranit piffissamut suliffimmut ukiorlu kaajallallugu anguniagaqarfiusumik iliuuseqarnernut annertuumik ineriartorfiusimavoq.

Taamaammat tamanna tunngavigalugu aningaasarsiaqartitsinermut inatsisip nutarterneqarnissaa pisariaqalersimavoq.

Inatsisartut 2000-imi ukiakkut ataatsimiinneranni Inatsisartut Siulittaasoqarfiat aningaasarsiaqartitaanermut inatsisip nutarterneqarnissaanut siunnersuummik saqqummiussivoq. Siunnersuulli taperserneqarsinnaasimanngilaq.

Tamatuma kinguneratut suleqatigiissitap atorfilinnik inuttallip suliassarisimavaa aningaasarsiaqarnermut soraarnerussutisiaqarnermullu tunngaviliussat arlallit, Inatsisartuni amerlanerussuteqartut tapersigaat aallaavigalugit, inatsisip nutarterneqarnissaanik nutaamik siunnersuusiorluni suliarinninnissaq.

Anguniagaasimavoq aningaasarsiaqartitaaneq pillugu inatsit, inatsisip aqutsivigineqarneranut nukiit atorneqartussat killiliivigineqarnissaat, inatsisillu takulertoruminartuullunilu paasilertoruminartuunissaanik kissaateqarneq pissutigalugit, sapinngisamik pisariinnerpaatinneqassasoq.

UKA 2001-imi paasinarsivoq ataatsimiinnerup matuma ingerlanerani Inatsisartuni ilaasortat amerlanerussuteqartut kissaatigigaat aningaasarsiaqartitaanermut inatsisissatut siunnersuut nu-taaq, siunnersuummut tunngaviutinneqartut atorlugit ingerlaanartumillu atortuulersinneqartussanngorluni saqqummiunneqassasoq. Tunngaviit qulaani taaneqartut tunngavigalugit Inatsisartuni Naalakkersuisunilu il.il. ilaasortanut aningaasarsiaqartitaaneq il.il. pillugit Inatsisartut inatsisissaattut siunnersuut matumani pineqartoq Siulittaasoqarfiup saqqummiuppaa.

Inatsisartuni Naalakkersuisunilu qinikkatut inissisimanerup naleqquttumik aningaasarsiaqarfiunissaat qulakkeerneqarnissaata saniatigut siunnersuut aningaasarsiaqartitsinermut inatsimmut atuuttumut naleqqiullugu allannguutinik malunnaateqarluartunik marlunnik imaqarpoq.

Siullertut inatsisip atortuulersinneqarneratigut soraarnerussutisiaqarnermut aaqqissuussineq namminersortumik ingerlanneqartoq atugaalissaaq. Inatsisartuni Naalakkersuisunilu ilaasortat soraarnerussutisiaqarnerannut tunngasut pitsaanerulersinniarlugit siunnersuutigineqarpoq ani-ngaasarsiaqartitaaneq pillugu inatsimmi atuuttumi soraarnerussutisiat anginerpaaffissaattut pissarsiarineqarsinnaasunut killiliussaq atorunnaarsinneqassasoq. Atorunnaarsitsinerli maanna siunissamilu Inatsisartuni Naalakkersuisunilu ilaasortanut taamaallaat atuutissaaq.

Aappaattut aningaasartuutinut matussutissatut tapisiat pillugit maleruagassat allanngortinneqarput, taamaalilluni aningaasartuutinut matussutissatut tapisiat Inatsisartuni ilaasortap Inatsisartuni ilaasortatut sulinerminut atatillugu aningaasartuutigiunnagaanut tamanut matussutissaassallutik.

Allaffissornikkut pisariillisaaniarnermut ilanngullugu siunnersuutigineqarpoq aningaasarsia-qartitsinermut inatsit atuuttoq naapertorlugu Inatsisartuni ilaasortanut ullormusiaritinneqartartut atorunnaarsinneqassasut. Taarsiullugu aningaasartuutinut matussutissatut tapisiat ima annertussuseqalersillugit qaffanneqassapput, qinigaaffimmut atatillugu aningaasartuutiviusartut matussusiivigineqarnissaannut matusissutigissallugit piviusorsiortumik angissusilerlugit.

Taamaakkaluartoq aningaasartuutinik Inatsisartuni sulinermut toqqaannartumik attuumassuteqartunik aningaasartuutinut matussutissatut tapisiat saniatigut matussuserneqartartunik allanik suli peqarpoq. Aningaasartuutit taakku aningaasartuutinut matussutissatut tapisiat aningaasartuutinut tamanut matussutissaaneri pillugit maleruagassatut aalajangersakkap saniatigut ani-ngaasartuutigineqartartussatut inatsimmi toqqaannartumik taagorneqarput. Aningaasartuutit taamaattut assersuutigalugu ataatsimiititaliat angalanerinut aamma Kalaallit Nunaanni inatsisiliortutut sinniisaanermut tunngasuupput. Aningaasartuutit taamaattut matussuseqarnerat pi-sarpoq immikkut siumut akuersissutigeqqaarlugu.

Ilaasortat paasisassarsiorlutik angalasarnissaminnut Inatsisartullu ataatsimiinnerannut atasumik aappaminnik ingiaqateqartarnissaminnut periarfissaat aningaasarsiaqartitsinermut inasimmi atuuttumi aalajangersakkanut naleqqiullugit annertusineqarput, aammalu Inatsisartuni ilaasortat qitornaasa angerlarsimaffimminni najugaqartut 18-it inorlugit ukiullit Inatsisartut ataat-simiinnerannut atasumik ingiaqataanerminni angalanerminnut ineqarnerminnullu akiliunne-qartarnissaannut periarfissamik atulersitsisoqarluni.

 

Siunnersuutip aningaasatigut allaffissornikkullu kingunerisassai

Siunnersuutip Inatsisartunut aningaasartuutit ilanngaaseereerluni 7.171.132 kr.-inik aningaa-sartuuteqarnerulerneq kingunerissavaa.

Aningaasartuutit amerleriaataat imatut agguataarneqarput:

Ilaasortat aningaasarsiaasa qaffaataat	3.718.550 kr.
Aningaasartuutinut matussutissatut tapisiat qaffaataat	1.652.760 kr.
Aningaasaqarnermut Ataatsimiititaliap ilaasortaasa aningaasarsiaasa qaffaataat	106.500 kr.
Kukkunersiuinermut Ataatsimiititaliap ilaasortaasa aamma Inatsisartut siulittaasuata tullersortaasa aningaasarsiaat	324.000 kr.
Qitornat aapparisallu angalasarneri, missingikkat	400.000 kr.
Paasisassarsiorluni angalasinnaanerit annertusinerat.	736.250 kr.
Sinniisussat	250.000 kr.
Soraarnerussutisianut akileeqataassutit	1.338.072 kr.
Katillugit	8.526.132 kr.

Akerlianik makku ileqqaarutaassapput:

Ullormusiaqartitsinerup atorunnaarsinnera	930.000 kr.
Avisinut aningaasartuutit	75.000 kr.
Aningaasartuutit allat	350.000 kr.
Katillugit	1.355.000 kr.

 

Siunnersuut Naalakkersuisunut aningaasartuutit 1.434.588 kr.-inik amerleriarnerinik kinguneqassaaq.

Aningaasartuutit amerleriaataat imatut agguataarneqarput:

Aningaasarsiat qaffaataat	690.792 kr.
Naalakkersuisuni ilaasortat aappaasa nerisaqartinneri ineqartinnerilu, missingikkat	100.000 kr.
Naalakkersuisuni ilaasortat aappaasa angalasarneri	250.000 kr.
Soraarnerussutisianut akileeqataassutit	393.796 kr.
Katillugit	1.434.588 kr.

Siunnersuut Landskarsimut katillugit minnerpaamik 8.605.720 kr.-inik aningaasartuuteqarnerunermik kinguneqassaaq.

 

Soraarnerussutianut akileeqataassutissanut aningaasartuutinut qaffaatissat naatsorsorneqarnerannut tunngaviuvoq maannakkut soraarnerussutisianut akileeqataassutaasartut pisussaaffiunerisa (6%) naatsorsoqqissaarneqarnissaannut missingiineq. Taamatut pisussaaffimmut matussutissanik maannakkut toqqorsisoqarneq ajorpoq, aningaasartuutit, ukiuni soraarnerussutisianik tunniussiviusussani, ingerlaavartumik ilanngunneqartarnissaat toqqarneqarsimammat. Siunissami soraarnerussutisianut akileeqataassutaasarumaartut aningaasanut inatsimmi ani-ngaasartaat tamakkerlugit, aningaasarsiatut tunniussat 15%-iisut annertussusillit, ilanngullugit ilaatinneqartalerumaarput (katillugit kr. 2.403.067)

Ilaasortaajunnaarnersiutit, aamma Inatsisartuni Naalakkersuisunilu ilaasortat aappaasa toqukkut qimatat aningaasarsiaasa kiisalu soraarnerussutisiassanut aningaasartuutit amerleriaataasa missingerneqarnissaasa eqqoriaruminaappallaarnissaat pissutigalugu taakku missingerneqan-ngillat.

Taamatuttaaq Inatsisartuni ilaasortaanngitsut ataatsimiititaliani, nævnini aamma siinniisuutitaqarfinni sulinermut peqataanerannut aningaasarsianut aningaasartuutinullu matussutissatut ta-pisianut aningaasartuutit qaffariaatissaat erseqqinnerusumik missingiivigissallugit ajornarsimavoq. Qaffariaatissalli annertuallartussaanngitsutut nalilerneqarput.

Siunnersuut Inatsisartut Allattoqarfianni allaffissornikkut sulinermut annertuumik oqilisaa-taassaaq, ilaasortat ullormusiassaannik tuniussisarnerit allaffissornikkut aqutsivigineqarunnaassammata.

 

Siunnersuummi aalajangersakkanut ataasiakkaanut nassuiaatit

 

§ 1-imut

Aalajangersakkakkut ilaatigut aalajangersarneqarput Inatsisartuni ilaasortat aningaasarsiaat aamma aningaasartuutit matussusiivigineqartarnerannut tapit, taamatullu Inatsisartuni ilaasortat inissamik innersuussivigineqartarnerat.

Inatsisartuni ilaasortat aalajangersagaq naapertorlugu aningaasarsianik akissaatit inissisimaffianni 36-imi aningaasarsiat immikkut tapisiartallit angeqataannik (taamaattorli skalani akissaatinut tapit tamanut atuuttut AS - G'p isumaqatigiinniartarfiani akissaatinut tunngasuugaluartut pinnagit). Aningaasarsiat ingerlaavartumik iluarsiivigineqartassapput, taamaalilluni AS - G'p isumaqatigiinniartarfiani ineriartornermut malinnaatinneqassallutik. Siunnersuutip saqqummiunneqarnerani aningaasarsiat ukiumut kr. 353.414-inik angissuseqarput.

Aningaasarsiat, naalakkersuinikkut qinigaaffiup sulianermut piumasaqaatitaanut naapertuuttutut isigineqarput, kiisalu qinikkatut piffissaq tamakkiisumik suliffittut isigalugu naleqquttumik angissusilittut isigineqarlutik. Aningaasarsiattaaq Inatsisartuni ilaasortat akisussaaffiannut naapertuuttutut isigineqarput. Aningaasarsiat ima angissuseqartariaqarput Inatsisartunut qinigaanissaq pilerinartuusariaqarluni.

Inatsisartut ilaasortaannut aningaasarsiat nammineq saniatigut aningaasartuutinut matussutissatut tapinik tunniussisoqartassaaq. Aningaasartuutinut matussutissatut tapi aningaasartuutinut, Inatsisartunit ilaasortap qinigaaffimminut atatillugu frimærkinut, pappiaranik nuutiterinermut, telefonimut, mobiltelefonimut, telefaximut, internetimut, aviisinik aamma atuagassianik pisartagaqarnerinut kiisalu ataatsimiigiarluni ingerlanneqarnernut assigisaannullu aningaasartuutinut manna tikillugu matussutissatut tunniunneqartarsimapput.

Aningaasartuutinut matussutissatut tapi maannakkut atuuttoq 1993-imiilli iluarsiivigineqarsimanngilaq, taamaalillunilu akit nalinginnaasumik qaffariartornerannut malinnaatinneqarsimanani. Taamaammat aningaasartuutinut matussutissatut tapi qaffaavigineqassasoq siunnersuutigineqarpoq. Qaffaatip ilaatigut illuatungiliivigissavai Inatsisartuni ilaasortat ullormusiaasa atorunnaarsinneqarneri.

Inatsisartuni ilaasortat Nuummi najugaqartut aningaasartuutinut matussutissatut tapisiaat siunnersuut malillugu ukiumut 96.000 kr.-inik, qaammammut 8.000 kr.-inik, angissuseqassapput. Ilaasortanut allanut aningaasartuutinut matussutissatut tapi ukiumut 126.000 kr.-inik, qaam-mammut 10.500 kr.-inik, angissuseqassaaq. Aningaasartuutinut matussutissatut tapi ukiumut ataasiarluni nunatsinni akinut iluarsiissut malillugu ukioq taanna 1. januarimi iluarsiivigineqassaaq. Iluarsiineq nunatsinni akinik iluarsiissutip ineriartorfiunera, Kalaallit Nunaanni ukiup siuliani 1. julimi Kalaallit Naatsorsueqqissaartarfimmit naatsorsorneqartoq, januar 1984-imi= 100 tunngaviusumik aningaasartalik malillugu pissaaq, taamaalillunilu taakku 60.380 kr.-iullutillu 79.250 kr.-iullutik.

Aningaasartuutinut matussutissatut tapip Inatsisartuni ilaasortanut Nuummi najugaqartuun-ngitsunut angineruneranut pissutaavoq, ilaasortat taakku Inatsisartut ataatsimiinnerisa nalaani - ilaasortanut Nuummi najugalinnut sanilliullutik - angerlarsimaffimmik avataaniinnerminnut atatillugu immikkut aningaasartuuteqartarmata. Assersuutigalugu Inatsisartuni ilaasortat akunnittarfimmi inissinneqartut nammineerlutik nerisassiortussaanngillat, atisanik errorsissanatik assigisaanillu. Tamatuma kinguneraa neriniartarfimmi neriniartarfinnilu allani nerinermut, kii-salu errortassanut atisanullu simerniiagassanut immikkut aningaasartuuteqartariaqarneq. Taakku saniatigut telefoninut, aviisinut assartuinermullu immikkut aningaasartuutit ilanngutassaapput. Aningaasartuutit taamaattut ullormusianit, atorunnaarsinneqarnissaannik siunnersuutigineqartunit, maannamut matussuserneqartarsimapput.

Ilaasortat Nuummi najugallit aningaasartuutinut matussutissatut tapisiarisartagaasa aamma ilaasortat allat aningaasartuutinut matussutissatut tapisiarisartagaasa nikingassutaat siunnersuut malillugu 30.000 kr.-iuvoq. Taanna maleruagassat atuuttut malillugit sapaatip akunnerini 15-ingajanni ullormusiat angeqatigaat, taamaalillunilu manna tikillugu Inatsisartut ataatsimiinnerinut atatillugu ullormusianut tunniunneqartarsimasunut taartaasussaalluni.

Inatsisartuni ilaasortaq Nuup Kommuniata nunaqarfiisa ilaanneersoq - Inatsisartuni ilaasortat illoqarfinni allani najugallit assigalugit - aningaasartuutinut matussutissanik anginernik pisinnaatitaassaaq. Taamaattussaavoq pineqartoq Inatsisartut ataatsimiinnerisa nalaani angerlarsimaffini qimallugu ineqartussaammat.

Aningaasaqarnermut Ataatsimiititaliami Kukunersiuinermullu Ataatsimiititaliami ilaasortat kiisalu Inatsisartut siulittaasuata tullersortai ataatsimiititaliani taakkunani marlunni ilaasortat aamma Inatsisartut Siulittaasoqarfiata immikkut suliassaqarnerat pissutigalugu immikkut ani-ngaasarsiaqartinniarneqarput.

Aamma Inatsisartut inatsisaat atuuttoq malillugu Aningaasaqarnermut Ataatsimiititaliami ilaasortanut immikkut aningaasarsiaqartitsisoqarpoq. Inatsisartut siulittaasuata tullii aamma Kukkunersiuinermut Ataatsimiititaliami ilaasortat manna tikillugu immikkut aningaasarsiaqartinneqarsimanngillat. Suliakkersugaaneq, Inatsisartut Siulittaasoqarfiannut Kukkunersiuinermullu Ataatsimiititaliamut atuuttoq, maanna ima annertussuseqalersimavoq Aningaasaqarnermut Ataatsimiititaliap ilaasortanuinnaq immikkut aningaasarsianik tunniussinissaq pissusissami-soortutut isigineqartariaqalersimalluni.

Aningaasaqarnermut Ataatsimiititaliami ilaasortat siunnersuut malillugu ukiumut immikkut aningaasarsianik 60.000 kr.-inik, qaammammut 5.000 kr.-inik angissusilinnik, tigusaqartartussaapput. Inatsisartut siulittaasuata tullii aamma Kukkunersiuinermut Ataatsimiititaliami ilaasortat siunnersuut maillugu ukiumut 36.000 kr.-inik, qaammammut 3.000 kr.-inik angissusilinnik, tigusaqartartussaapput. Immikkut aningaasarsiat Inatsisartut aningaasarsiaattulli iluarsiivigineqartassapput, taamaalilluni AS - G'mi ineriartornermut malinnaatinneqarlutik, ani-ngaasarsianut procentinngorlugu iluarsiissutip angeqataanik procentinngorlugu immikkut tapisianik, nr. 97-imi taaneqartunik ukiumut kr. 53.200-inik aamma nr. 84-imi taaneqartunik kr. 31.930-inik, ukiumut tunngaviusumik aningaasartalinnik iluarsiivigineqassallutik.

Aningaasarsiat § 1-imi taaneqartut tamarmik aamma aningaasartuutinut matussutissatut tapisiat qaammammoortumik siumoortumik tunniunneqartassapput.

Ferierneq pillugu Inatsisartut inatsisaat naapertorlugu namminersortuni pisortaniluunniit sulif-feqarlutik sulinermik inuussutissarsiuteqartut tamarmik feriernissamut aammalu feriernersiu-teqarnissamut feriernermiluunniit akissarsiaqarnissamut pisinnaatitaapput. Inatsisartuni Naa-lakkersuisunilu ilaasortat namminersortuni pisortaniluunniit suliffeqarlutik sulinermik inuus-sutissarsiuteqartunut assersuunneqarsinnaanngimmata Inatsisartuni Naalakkersuisunilu ilaasortat ferierneq pillugu Inatsisartut inatsisaanni aalajangersakkanut ilaanngillat, tamatumalu kingunerisaanik aningaasarsiaqartitsinermut inatsit naapertorlugu aningaasarsiat feriernersiu-teqaataasinnaanngillat feriernermiluunniit akissarsiaqaataasinnaanatik.

Nutaatut siunnersuutigineqarpoq Inatsisartuni ilaasortaq inoqutini peqatigalugit Nuummi najugaqalernissamik kissaateqartoq inissamik atugassiivigineqartalissasoq. Ini Namminersornerullutik Oqartussat pisortanut inigitittagaattut tunniunneqartartunit atugassiissutigineqassaaq. Inatsisartuni ilaasortaq inissarsiortoq taakkunani inissarsinissamut pisinnaatitaasut assigalugit inissarsiortunut ilanngutissaaq.

Inatsisartuni ilaasortanut Nuummi najugaqarneq ulluinnarni pitsaaqutissartaqarpoq. Ilaatigut Inatsisartut ataatsimiinnerisa nalaani ilaquttanik maqaasisaqartarneq annikillisinneqassaaq, ilaatigullu Inatsisartut ataatsimiinnerisa avataatigut ataatsimiititaliat sulinerini annertusiartuinnartuni peqataasinnaanerat ajornaannerulersinneqassaaq.

Aningaasaqarniarnikkut isigalugu tamanna Landskarsimut sipaarutinik, Inatsisartuni ilaasortaq ullumikkut Nuup avataani najugaqartoq Nuummut nuunnissamik aalajangerpat, kinguneqassaaq. Inatsisartut ataatsimiinnerinut atasumik Landskarsip angalanernut ineqarnernullu aningaasartuutigisartagai taamaalillutik ikilisinneqartussaapput, soorlu aamma aningaasartuutinut matussutissatut tapimut aningaasartuutinut taamaattussaasoq.

Inatsisartuni ilaasortat inissamik innersuussivigineqartut maleruagassat nalinginnaasut malillugit ineqarnermut akiliuteqartinneqassapput. Qinigaaffiup naaneratigut ini qimanneqassaaq, imaalilluguli, piffissami soraarnerussutisiaqarfiusumi inimik atugassiisoqartassalluni. Ini taa-maallaat utaqqiisaasumik atugassiissutigineqaraluaruniluunniit (piffissami ilaasortaajunnarnersiuteqarfiusumi) utaqqiisaasumik inissiatut isigineqassanngilaq, inilu taamaattoq aamma ineqarnermut akiliummik nalinginnaasumik akilerneqartassaaq. Ilaasortaajunnaarnersiuteqarfik naappat inimik atugassiisoqarsinnaajunnaassaaq.

 

§ 2-mut

§ 2, imm. 1-imi 2-milu, § 1, imm. 1 malillugu aningaasarsianik, § 1, imm. 2 malillugu ani-ngaasartuutinut matussutissatut tapisianik, kiisalu § 1, imm. 3 malillugu immikkut aningaasarsianik, nalinginnaasumik qinersisoqarnerani piffissap qinigaaffiup ingerlanerani ilaasortan-ngornertulli, piffissamik tunniussiffiusumik killiliisuupput.

Inatsisartut Siulittaasoqarfiat Inatsisartut Suleriaasianni maleruagassat malillugit Inatsisartuni ilaasortap sulinngiffeqarnissaanik akuersissutiginnissinnaavoq. Sulinngiffeqarfimmi Inatsisartuni ilaasortaq aningaasarsiaqaranilu aningaasartuutinut matussutissanik tapisiaqassanngilaq. Aamma Aningaasaqarnermut Ataatsimiititaliami aamma Kukkunersiuinermut Ataatsimiititaliaami ilaasortat kiisalu Inatsisartut Siulittaasuata tullii sulinngiffeqartillutik immikkut aningaasarsiaqartinneqassanngillat.

Inatsisartuni ilaasortaq piffissami sulinngiffeqarnermini soraarnerussutisiaqarnissamut katersissanngilaq.

Inatsisartuni ilaasortap napparsimanera pissutissaqarluni sulinngiffeqarnertut isigineqassaaq. Tamatuma kingunerissavaa Inatsisartuni ilaasortaq pineqartoq napparsimalluni sulinngiffeqarnermini aningaasarsiani, aningaasartuutinut matussutissatut tapisiani immikkullu aningaasarsiariunnakkani pigiinnassagai, soorluttaaq pineqartoq napparsimalluni sulinngiffeqarnermini soraarnerussutisiaqarnissamut katersisinnaasoq.

Qanigisat toqunerannut perulullutilluunniit napparsimanerattulli napparsimanermi najuutin-nginneq pissutissaqarluni najuutinnginnertut isigineqassaaq. "Qanigisatut" isigineqarput Inatsisartuni ilaasortap apparisaa, inooqataa, qitornai, ernutai, angajoqqaavi qatanngutaalu.

Aammattaaq naartunermi, erninermi meeravissiartaarnermilu najuutinnginneq pissutissaqarluni najuutinnginnertut isigineqassaaq. Namminersornerusut kaajallaasitaat nr. 2 21. september 1989-imeersoq najoqqutassiisuusutut isigineqassaaq.

 

§ 3-mut

Siunnersuut una naapertorlugu maleruagassaq pingaarneq tassaavoq aningaasartuutit aningaa-sarsiaqartitsinermut inatsimmi immikkut taaneqartut kisimik aningaasartuutinut matussutissatut tapisiat saniatigut matussuserneqartassasut.

Tunngavigisaq taanna naapertorlugu § 3, imm. 1-imi aalajangersarneqarpoq § 1, imm. 2 naa-pertorlugu aningaasartuutinut matussutissatut tapisiat Inatsisartuni ilaasortap Inatsisartuni ilaasortatut sulinermini aningaasartuutigiunnagaanut tamanut matussutissaasut.

Aningaasarsiaqartitsinermut inatsit atuuttoq naapertorlugu assersuutigalugu ilaasortat Nuummi najugaqartuunngitsut Inatsisartut ataatsimiinnerinut atatillugu ullormusiaat tunniunneqartarput. Aammattaaq ataatsimiititaliat angalanerini paasisassarsiorlunilu angalanerni ullormusi-aqartitsisoqartarpoq.

Ilaasortat aningaasarsiaqartitaanerisa pisariillisaavigineqarnerata, nalinginnaasumik nassuiaatini oqaatigineqartut, ilaatut Inatsisartuni ilaasortat anginerusunik aningaasartuutinut matussutissatut tapisiaqartinneqarnissaat pissusissamisuussaaq, taarsiullugulu aningaasartuutit matussutissaattut tapi taanna aningaasartuutinik, Inatsisartuni ilaasortap qinigaanerminut atasumik aningaasartuutigiunnagaanut tamanut taarsiullugu matussutaatillugu.

Inatsisartuni ilaasortanut taakku aningaasatigut kinguneqaatissaannut apeqqutaasussaavoq ullut angalaffiit qassit ilaasortat ataasiakkaat atugassarineraat. Ilaasortat ullunik ikittunik a-ngalaffissallit ilaasortanit allanit amerlasuunik angalaffissalinnit iluaqutissaqarnerussapput. Taamaakkaluartoq aningaasartuutit matussutissaattut tapit qaffanneqarnissaannik siunnersuut Inatsisartuni ilaasortat amerlanersaannut ullormusiat atorunnaarsinneqarnerannut matussutaasussaavoq.

Aningaasartuutinut matussutissatut tapisiat aningaasarsiaqartitsinermut inatsimmi atuuttumi aalajangersarneqartutuulli isertitanut akileraarutaasussaatitaasunut ilaatinneqanngillat. Tamatuma kingunerisaanik aningaasartuutit aningaasartuutinut matussutissatut tapisianit matussu-serneqartartut isertitanit akileraarutaasussaatitaasunit ilanngaatigineqarsinnaanngillat.

Inatsisartuni ilaasortat aningaasartuutaannik aningaasartuutinut matussutissatut tapisiat saniatigut matussuserneqartartunik suli peqarpoq.

Tamatumani pineqarput ilaasortat Nuummi najugaqartuunngitsut Inatsisartut ataatsimiinnerinut atatillugu angalanerminnut ineqarnerminnullu aningaasartuutaannik akiliussisarnerit, ataatsimiititaliat ataatsimiinnerinut angalanerinullu atatillugu angalanernut ineqarnernullu ani-ngaasartuutit kiisalu ilaasortat paasisassarsiorlutik angalanerinut atatillugu angalanernut ineqarnernullu aningaasartuutit.

Ilaasortat Nuummi najugaqartuunngitsut Inatsisartut ataatsimiinnerinut atatillugu angalaner-minnut ineqarnerminnullu aningaasartuutaannik akiliussisarnerni taamaallaat Nuummut uterlugulu angalanerini aningaasartuutit akilerneqartassapput. Inatsisartuni ilaasortaq Inatsisartut ataatsimiinnerannut atatillugu angalanerminut malitsiinnarlugu allamut angalaniaruni angalanermut aningaasartuutit nammineq akilissavai.

Ataatsimiititalialli ataatsimiinnerinut angalanerinullu atatillugu angalanernut ineqarnernullu aningaasartuutinut kiisalu ilaasortat paasisassarsiorlutik angalanerinut atatillugu angalanernut ineqarnernullu aningaasartuutinut tunngatillugu piumasaqaataavoq Inatsisartut Siulittaasoqarfiata Inatsisartulluunniit siulittaasuata angalaneq akuersissutigisimassagaa.

Inatsisartuni ilaasortat aningaasanut killiliussat kr. 30.000-it iluini Kalaallit Nunaanni pissutsinik paasisaqarnerunissartik siunertaralugu Kalaallit Nunaanni sumiiffiit arlaannut qaammatisiutit malillugit ukiup ataatsip ingerlanerani ataasiarlutik angalasinnaatitaassasut. Tamanna paasisassarsiorluni angalasinnaatitaanerit malunnaateqarluartumik amerleriaatigaat, tassami aningaasarsiaqartitsinermut inatsit atuuttoq naapertorlugu piffissap qinigaaffiup ingerlanerani taamaallaat ataasiarluni paasisassarsiorluni angalanissamut periarfissaqartitsisoqarpoq.

Paasisassarsiorluni angalasinnaatitaanerit taamatut amerleriarnerinut sanilliullugu isiginiarne-qassaaq qinersinermut inatsisip Inatsisartut 1998-imi ukiakkut ataatsimiinneranni allanngor-tinneqarnerata kingorna Kalaallit Nunaat ataasinngorluni qinersivinngorsimammat angisooq, tamatumalu kingunerisaanik paasisassarsiorluni angalanissat pisariaqartinneqarnerat malunnaateqarluartumik annertusisimavoq.

Aningaasatigut killiliussaq kr. 30.000-it paasisassarsiorluni angalanermut atatillugu angalanermut ineqarnermullu aningaasartuutinut matussutissatut atorneqassapput. Inatsisartuni ilaasortaq qaammatisiutit malillugit ukiup naanerani aningaasat atugassiissutit kr. 30.000-it tamakkerlugit atorsimanngippagit aningaasat sinneruttut ukiumut tullermut nuunneqarsinnaasuussanngillat. Tamanna aqutsinermut attuumassuteqarpoq. Aningaasalli atugassiissutigineqartut ima annertussuseqarput aningaasatut killiliussatut taaneqartut iluanni nunatsinni illoqarfik nunaqarfilluunniit sumiikkaluartoq tunngaviusumik isigalugu paasisassarsiorluni angalanermi ornigassanngortinneqarsinnaalluni, tassa imaappoq; qaammatisiutit malillugit ukiumut nutaamut aningaasanik "sipaakkanik" nuussinngikkaluarluni.

Inatsisartunik qinersisoqarnissaanik nalunaaruteqarnerup Inatsisartunilu ilaasortat qinerneqartut akuersissutigineqarnerisa akornanni angalanerit Landskarsimit akilerneqarsinnaanngillat, aatsaalli taamaaliortoqarsinnaalluni kinguartinneqarsinnaanngitsunik angalasoqartariaqarpat.

Piffissap tamatuma immikkuullarinneranut pissutaavoq, tunngaviusumik isigalugu Inatsisartut atorunnaarsitaasimammata, taamaammallu nalinginnaasumik angalanissamut periarfissat atortuujunnaarsinneqarsimammata, aatsaallu angalanerit pisinnaallutik partiit namminneq, partimut tapiissutitut konto atorlugu, akiligaannik. Taamaattorli ataatsimiinnissanut il.il. angalanerit kinguartinneqarsinnaanngitsut pisarnertut ingerlatiinnarneqarsinnaapput. Inatsisartut Siulittaasuat immikkut akuersissuteqarsinnaavoq, erseqqipporli Inatsisartut susassaqarfiannut aalajangersimasumik attuumassuteqartutut isigineqartariaqartoq, qinigaarlaat akuersissutigineqarnissaannut utaqqinneqarsinnaanngitsoq. Taakku tassaasinnaapput nunat tamalaat akornanni oqartussaaffimmi ataatsimiinnerit, ilaasortap pineqartup piffissamik ataatsimiiffissamiut sunniuteqarfigisinnaasimanngisai.

 

§ 4-mut

Aningaasarsiaqartitaanermut inatsit atuuttoq malillugu piffissani tamarmik ukiunik sisamanik sivisussusilimmi 1. januar 1990-imit naatsorsorneqartumi Inatsisartuni ilaasortap aapparisaanut, Inatsisartut ataatsimiinnerannut atatillugu, Nuummut angalanissamut marloriarluni akiliussisoqartarpoq. Inatsisartuni ilaasortap qitornaanut akiliussilluni angalasoqarsinnaanngilaq.

Ilaasortat Nuummi najugaqartuunngitsut Inatsisartut ataatsimiinnerisa nalaani ilaquttaminnit avissaarsimanertik pissutigalugu annertuumik maqaasisariaqartarput. Aamma aapparisamut qitornaasunullu Inatsisartut ataatsimiinnerisa nalaani sivisuumik avissaarsimasariaqarneq oqimaatsuuvoq.

Inatsisartut Suleriaatsimut Ataatsimiititaliaat 2000-imi Inatsisartut upernaakkut ataatsimiinneranni isummerpoq Inatsisartut ataatsimiittarneri sivitsorneqartariaqartut. Taamaammat naatsorsuutigisariaqarpoq Inatsisartut siunissami ataatsimiittarneri sivisunerulerumaartut. Taamaammat Inatsisartut ataatsimiinnerinut aapparisat angalasinnaanerat annertuumik sivitsuiffigineqassaaq, taamaalilluni aapparisaq qaammatisiutit malillugit ukiut tamaasa ataasiarluni Inatsisartuni ilaasortamik Inatsisartut ataatsimiinnerannut ingiallortaasinnaalissalluni. Taamaallat angalaneq ineqarnerlu aapparisamut akiliussissutigineqassapput, ullormusiaqartitsisoqaranili.

Tamatuma peqatigisaanik siunnersuutigineqarpoq qaammatisiutit malillugit ukiut tamaasa ataasiarluni Inatsisartuni ilaasortap qitornai 18 inorlugit ukiullit angalanermut ineqarnermullu akiliunneqarsinnaalissasut. Meeqqamut ullormusianik tunniussisoqartassanngilaq.

Meeraq 18-inik ukioqalerpat angalanermut ineqarnermullu akiliussisoqarsinnaajunnaassaaq.

Inatsisartuni ilaasortaq Naalakkersuisuni ilaasortaajutigippat aapparisaa qitornaaluunniit angerlarsimaffimminni najugaqartut 18-it inorlugit ukiullit Inatsisartut ataatsimiinnerannut atatillugu ingiaqataanerminni angalanerminnut ineqarnerminnullu akiliunneqartassanngillat. Naalakkersuisuni ilaasortap aapparisaata qitornaasalu akiliunneqarlutik angalasinnaanerinut maleruagassat siunnersuummi § 8, imm. 4-mi imm. 5-imilu naammattuugassaapput.

 

§ 5-imut

Aalajangersakkami Inatsisartuni ilaasortamut sinniisussap aningaasarsiai aalajangersarneqarput.

Inatsisartuni ilaasortap sinniisussaa ullut Inatsisartuni ilaasortamut taartaaffini tamaasa ani-ngaasarsiat § 1, imm. 1-imi aalajangersarneqartut 1/365-erarterutaannik aningaasarsiaqartinneqartassaaq. Taakku saniatigut sinniisussaq sumi najugaqarnini apeqqutaatillugu aningaasartuutinut matussutissatut tapisiat § 1, imm. 2-mi taaneqartut 1/365-erarterutaannik tapisiaqartinneqartassaaq. Tamatuma kingunerisaanik sinniisussap Nuummi najugaqartup ullormut ani-ngaasartuutinut matussutissatut tapisiai kr. 96.000-it 1/365-erarterutaannik annertussuseqassapput. Sinniisussap Nuummi najugaqartuunngitsup aningaasartuutinut matussutissatut tapisiai kr. 126.000-it 1/365-erarterutaannik annertussuseqassapput. Aningaasartuutinut matussutissatut tapi Inatsisartuni ilaasortanut iluarsiisarnerit assigalugit iluarsiivigineqartassapput. Piffissap sinniisussap aningaasarsiaqarfigisaata aningaasartuutinullu matussutissanik tapisiaqarfigisaata erseqqinnerusumik killiliivigineqarnerani ullut angalaffiit ilanngullugit naatsorsuutigineqassapput. Sinniisussaq taamaalilluni Nuummut Nuummiillu angalanermini, Inatsisartut ataatsimiinneranni peqataanerminut atatillugu aningaasarsiaqartinneqarlunilu aningaasartuutinut matussutissatut tapisiaqartinneqassaaq.

Taakku saniatigut sinniisussaq angalanerminut ineqarnerminullu akiliunneqassaaq, ullormu-siaqartinneqarnanili.

Inatsisartut Siulittaasoqarfiata qinnuteqarneq tunngavigalugu akuersissutigisinnaavaa sinnii-sussap aapparisaa qitornaalu angerlarsimaffimminni najugaqartut 18-it inorlugit ukiullit, Inatsisartut ataatsimiinnerannut, sinniisussap Inatsisartuni ilaasortaq taarserlugu ataatsimeeqataaffigisaanut, atatillugu ingiaqataanerminni angalanerminnut ineqarnerminnullu akiliunneqassasut. Taamaalilluni sinniisussaq aapparisami qitornamilu ingiaqatiginissaannut Inatsisartuni ilaasortatut pisinnaatitaanngilaq.

Siulittaasoqarfiup qaqugukkut angalanermut ineqarnermullu aningaasartuutinik akiliussinissamik nalilersuinermini piffissap sinniisussap Inatsisartuni ilaasortamik taarsiiffiata sivisussusia pingaarnerutillugu isiginiartassavaa. Piffissaq sapaatit akunneri pingasut ataallugit sivisussuseqarpat angalanermut ineqarnermullu akiliussinissamut akuersissuteqartoqassanngilaq. Sinniisussap, aapparisaminut qitornaminullu qaammatisiutit malillugit ukiumi tassani angalanermut akiliunneqarsimasup aallaavittut isigalugu ilimagisariaqarpaa Inatsisartut ataatsimiin-nerannut aappaminit qitornaminillu ingiallorneqaqqikkumalluni qinnuteqaruni itigartinneqarnissi.

Sinniisussap aappaata qitornaasalu angalanermut ineqarnermullu akiliunneqarsinnaanerannut siornatigut periarfissaqartoqarsimanngilaq.

 

§ 6-imut

Aalajangersakkami Inatsisartut siulittaasuata, Naalakkersuisut siulittaasuata Naalakkersuisunilu ilaasortat aningaasarsiaat aalajangersarneqarput.

Inatsisartut siulittaasuat, Naalakkersuisut siulittaasuat Naalakkersuisunilu ilaasortat aningaa-sarsiaasa § 1, imm. 1-imi taaneqartut saniatigut aningaasarsiaqartinneqassapput akissaatit inissisimaffianni 39-imi nalinginnaasumik tapisiartaqartunik (skalamili akissaatinut tapit tamanut atuuttut, AS - G'mi isumaqatigiissuteqarfimmut attuumassuteqartinneqartaraluartut ilanngunnagit). Aningaasarsiat § 6, imm. 1, malillugu siunnersuutip saqqummiunneqarnerani kr. 388.085-iupput.

Siunnersuutigineqarpoq Inatsisartut Siulittaasuat aamma Naalakkersuisut Siulittaasuat immikkut tapisiat, akissaatit inissisimaffiannut 39-mut attuumassuteqartinneqartut angeqataannik, aamma ukiumoortumik aningaasarsiaqartinneqassasut. Immikkut tapisiat siunnersuutip saqqummiunneqarnerani kr. 137.845-put.

Naalakkersuisut Siulittaasuat maannamut Naalakkersuisuni ilaasortat sinnerisa aningaasarsiaasa angeqataannik aningaasarsiaqartinneqarpoq. Qinigaaffimmulli atatillugu immikkut akisussaaneq immikkullu suliakkersorneqarneq eqqarsaatigalugit pissusissamisoornerpaatut isigineqarpoq qinigaaffiup aningaasarsianik allanik ilaneqarnissaa.

Aallaavittut tunngavigisaq, Inatsisartut Siulittaasuat Naalakkersuisut Siulittaasuattut aningaasarsiaqartinneqassasoq atuutitiinnarneqarpoq.

Naalakkersuisuni ilaasortat Inatsisartuni ilaasortaanngitsut Naalakkersuisuni ilaasortamit Inatsisartuni ilaasortaatigisumit ajornerusumik pineqartariaqanngillat. Taamaammat Naalakkersuisuni ilaasortanut Inatsisartuni ilaasortaanngitsunut Inatsisartuni ilaasortanut aningaasarsianut tapip angeqataanik tunniussisoqartariaqarpoq.

§ 6 naapertorlugu aningaasarsiat qaammatip pineqartup qinigaaffiata aallaqqaataaniit qaammatip taamatut atuukkunnaarfiata naanissaata tungaanut aningaasarsiaritinneqartassapput. Aningaasarsiat qaammammoortumik siumoortumik tunniunneqartassapput.

Naatsorsuutigineqarmat Inatsisartut siulittaasuata, Naalakkersuisut siulittaasuata Naalakkersuisunilu ilaasortat Inatsisartuni ilaasortat immikkut aningaasartuutaattut ittunik taamatullu annertutigisunik immikkut aningaasartuuteqarneq ajortut aammalu Inatsisartut siulittaasuat, Naalakkersuisut siulittaasuat Naalakkersuisunilu ilaasortat regningi malillugu akilerneqartus-samik angalanissaq aalajangiussinnaammassuk, aningaasartuutinut matussutissatut tapisiaqar-tinneqanngillat.

Inatsisartut siulittaasuat Naalakkersuisullu siulittaasuat sinniisaanerminni isumagisassatik, qinigaaffinnut taakkununnga attuumassutillit, pissutigalugit ineqarnerminnut akiliisassanngillat, Naalakkersuisunilu ilaasortat sinneri inissaqartinneqassapput, maleruagassallu nalinginnaasut naapertorlugit taakkunani ineqarnerminnut akilersuisassapput.

Inatsisartut siulittaasuat Naalakkersuisullu siulittaasuat Inatsisartut siulittaasuattut Naalakker-suisullu siulittaasuattut atuukkunnaarnermik kingunitsianngua akilersornagit inigisaminnit nuussapput. Aamma Naalakkersuisuni ilaasortat sinnerinut inigitinneqartut Naalakkersuisuni ilaasortatut atuukkunnaarnerup kingunitsianngua qimanneqassapput.

Inatsisartut siulittaasuattut, Naalakkersuisut siulittaasuattut Naalakkersuisuniluunniit ilaasortatut tunuartut qinnuteqarnerat tunngavigalugu piffissami ilaasortaajunnaarnersiaqarfimmi utaqqiisaasumik ineqartitsisoqarsinnaavoq, ineqarnermut akiliummik nalinginnaasumik akiligassamik. Inigitinneqarallartoq Namminersornerusut pisortanut inissiaritittagaanniit sapinngisamik innersuunneqassaaq. Piffissap ilaasortaajunnaarnersiaqarfiup naanissaata tungaanut killilikkamik attartormut isumaqatigiissusiortoqassaaq. Piffissaq attartornermut isumaqatigiis-suteqarfik naappat inigigallagaq qimanneqassaaq, tamatumalu kingorna Inatsisartuni siulittaa-suujunnaartup, Naalakkersuisuni siulittaasuujunnaartup Naalakkersuisuniluunniit ilaasortaajunnaartup allamik inissarsiniarnissani nammineerluni akisussaaffigilissavaa.

 

§ 7-imut

Inatsisartut siulittaasuat, Naalakkersuisut siulittaasuat Naalakkersuisunilu ilaasortat Landskarsip akiligaanik ilassinninnersiuteqarsinnaatitaapput. Ilassinninnersiutit annertussusii aningaasanut inatsimmi ukiut tamaasa aalajangersarneqartassapput.

Nalinginnaasutigut aqutsinermut aningaasartuutit Naalakkersuisut ingerlatsinermut kontoanni, maannakkut 10.10.10-mi aamma Inatsisartut ingerlatsinermut kontoanni, 01.10.10-mi, ilaatinneqassapput.

 

§ 8-mut

Inatsisartut siulittaasuat, Naalakkersuisut siulittaasuat Naalakkersuisunilu ilaasortat Inatsisartut siulittaasuattut, Naalakkersuisut siulittaasuattut Naalakkersuisunilu ilaasortatut angalaner-nerminni Landskarsimit akiliunneqartassapput. Pineqartut ullormusiaqartinneqartassanngillat. Tassunga taarsiullugu nerisaqarnermut ineqarnermullu aningaasartuutit regningi malillugu matussuserneqartassapput.

Naatsorsuutigineqarpoq Inatsisartut siulittaasuata, Naalakkersuisut siulittaasuata Naalakkersu-isunilu ilaasortat tikeraarnermik angalanermillu ilaannut atatillugu aappatik angalaqatigisassagaat. Taamaattoqartillugu aapparisap angalaneranut ineqarneranullu aningaasartuutit Landskarsimit akilerneqartassapput. Aappariinnermut naligititaassaaq inuit aqqisa allattorsimaffianni najugaqatigiittut nalunaarsorneqarluni ukiumi ataatsimi inooqatigiinneq.

Nutaatut ilanngunneqarpoq Naalakkersuisuni ilaasortap aapparisaa qitornaalu angerlarsimaf-fimminni najugaqartut 18-it inorlugit ukiullit illoqarfigisaminniiginnarniarlutik aalajangersimagunik ukiut tamaasa marloriarlutik angalanerminnut akiliunneqartassasut.Aappariinnertut isigineqassaaq, Naalakkersuisuni ilaasortap qinigaaffimminut atatillugu Nuummi najugaqalerfiani, najugaqatigiittut ukioq ataaseq inuit aqqisa allattorsimaffianni allatsissimaneq. Nerisaqarnermut ineqarnermullu aningaasartuutit matussuserneqartassanngillat.

 

§ 9-mut

Aalajangersakkami Inatsisartut siulittaasuata, Naalakkersuisut siulittaasuata Naalakkersuisunilu ilaasortat sulianik allanik ingerlataqarsinnaanerinut tunngasut aalajangersarneqarput.

Maleruagassaq pingaarnerorpiartoq tassaavoq pineqartut Inatsisartuni siulittaasuunermik, Naalakkersuisuni siulittaasuunermik imaluunniit Naalakkersuisuni ilaasortaanermik nalaani sulianik allanik ingerlataqaqqusaanngitsut, tamatumani apeqqutaatinnagu suliaq pineqartoq akissarsiaqaataanersoq akissarsiaqaataannginnersorluunniit.

Suliaq taamaattoq ivertinneqarnerup nalaani ingerlanneqaruni taamaatinneqassaaq, aatsaallu tigummiinnarneqarsinnaalluni Qinersinerup Misilinneqarnissaanut Ataatsimiititaliaq tigum-miinnarnissaanut akuersippat. Aammattaaq Inatsisartut siulittaasuata, Naalakkersuisut siulittaasuata Naalakkersuisunilu ilaasortat Inatsisartut siulittaasuattut, Naalakkersuisut siulittaasuattut imaluunniit Naalakkersuisuni ilaasortatut atuunnermik nalaani sulianik nutaanik ingerlatsinissartik kissaatigigunikku Qinersinerup Misilinneqarnissaanut Ataatsimiititaliamit akuerineqaqqaassapput.

 

§ 10-mut

Aalajangersakkami Inatsisartuni ilaasortaanermut, Naalakkersuisuni ilaasortaanermut Inatsi-sartunilu siulittaasuunermut atatillugu ilaasortaajunaarnersiaqartitsinissat aalajangersarneqarput.

Inatsisartuni ilaasortatut tunuartoq § 1, imm. 1 naapertorlugu qaammammusiami kingulliit an-nertoqataannik ilaasortaajunnaarnersiaqartinneqassaaq.

Inatsisartut siulittaasuattut, Naalakkersuisut Siulittaasuattut Naalakkersuisunilu ilaasortatut tu-nuartut, § 6, imm. 1 naapertorlugu aningaasarsianik ilaasortaajunnaarnersiaqartinneqassapput. Inatsisartut Siulittaasuat aamma Naalakkersuisut Siulittaasuat § 6, imm. 2 malillugu tapisianik aamma ilaasortaajunnaarnersiaqartinneqassapput.

Naalakkersuisuni ilaasortatut tunuartoq Inatsisartuni ilaasortaanngikkuni § 6, imm. 1 naaper-torlugu Naalakkersuisuni ilaasortatut aningaasarsiat kiisalu § 6, imm. 3 naapertorlugu tapisiat annertoqataannik ilaasortaajunnaarnersiaqartinneqassaaq.

Ilaasortaajunnaarnersiat naatsorsorneqartassapput ukiut pineqartup katillugit ilaasortaaffigisi-masaasa aallartinneri tamaasa qaammatip aappaata affaani aningaasarsiassatut annertussusilerlugit.

Piffissat ilaasortaajunnaarnersiaqartitsiffiit sivisussusissaat Inatsisartuni ilaasortaasimanermut Naalakkersuisunilu ilaasortaasimanermut immikkoortillugit naatsorsorneqartassapput, tamatu-malu kingunerisinnaavaa ilaasortaaffigisimasat taakku arlaata sivisunerusumik ilaasortaajun-naarnersiaqaatiginera.

Piffissaq ilaasortaajunnaarnersiaqarfik tamatigut sivikinnerpaamik qaammatinik pingasunik sivisunerpaamillu qaammatinik aqqaneq marlunnik sivisussuseqartartussaavoq, t. i. pineqartoq ukiuni arfineq pingasuni taamatut atuussimagaangat ilaasortaajunnaarnersiai qaffasinnerpaaf-fissaminniittassasut.

Piffissap ilaasortaajunnaarnersiaqartitsiffiusussap naatsorsornerani piffissap atuuffiup ataatsip marloriarlugu ilanngunneqarnissaa pinaveersimatinniarlugu ilaasortaajunnaarnersiaqartitsisoqareersillugu ilaasortaaffigisimasami pineqartumi piffissaq, qanoq sivisutigisumik ilaasortaa-simaneq tunngavigalugu ilaasortaajunnaarnersiaqartitsinermik naatsorsuinermi tunngavigine-qartoq, sivikillineqassaaq. Ilaasortaajunnaarnersiat annertunerpaaffissamittut annertussuseqarlutik tunniunneqarsimappata piffissaq qanoq sivisutigisumik ilaasortaasimaneq tunngavigalugu ilaasortaajunnaarnersiaqartitsinermik naatsorsuinermi tunngavigineqartoq aallartiffimmii-tinneqalissaaq.

Inuk ilaasortaajunnaarnersiaqartoq piffissap ilaasortaajunnaarnersiaqarfimmi nalaani ilaasor-taaffimmut ilaasortaajunnaarnersiaqarfimminut ivertinneqaqqippat ilaasortaajunnaarnersiaqar-titaanera taamaatinneqassaaq aammalu qanoq sivisutigisumik atuussimaneq tunngavigalugu qanoq qanoq sivisutigisumik ilaasortaasimaneq tunngavigalugu ilaasortaajunnaarnersiaqartitsinissaq ukiut atuuffit ilaasortaajunnaarnersiaqaatigisat nalinginik sivikillineqassalluni.

 

§ 11-mut

Inatsisartut siulittaasuat, Naalakkersuisut siulittaasuat, Naalakkersuisuni ilaasortaq Inatsisartu-niluunniit ilaasortaq taamatut atuutsilluni toquppat aapparisaa qaammatini pingasuni aningaa-sarsiaqarsinnaatitaavoq.

Maleruagassaq taanna nutaajuvoq, tassami aningaasarsiaqartitsinermut inatsit atuuttoq naaper-torlugu ilaasortaajunnaarnersiassaqartoqarsimagaangat aapparisaq qimataq taakkuninnga tamaallaat pissarsiassaqarsinnaatitaavoq.

Ilaasortaq toqunermi nalaani ilaasortaajunnaarnersiaqarsimappat aapparisaq piffissap ilaasor-taajunnaarnersiaqarfissap sinnerani ilaasortaajunnaarnersiaqarsinnaatitaavoq. Ilaasortarli piffissami sivisunerusumi ilaasortaajunnaarnersiaqarsinnaatitaasimagaluarpalluunniit aapparisaq sivisunerpaamik qaammatini pingasuni ilaasortaajunnaarnersiaqarsinnaatitaavoq.

Ilaasortaq aapparisaminik qimataqanngippat imaluunniit aapparisaq qimataasoq ilaasortap toquneraniit qaammatit pingasut qaangiutinngitsut toquppat qitornaat 18-it inorlugit ukiullit, ilaasortamit angajoqqaatut oqartussaaffigineqarsimagunik, aningaasarsiaqarsinnaatitaalissapput ilaasortaajunnaarnersiaqarsinnaatitaalerlutilluunniit.

 

§ 12-imut

Landsrådimi, Inatsisartuni Naalakkersuisunilu siusinnerusukkut ilaasortaasimasut aningaasarsiaqartitaanermut inatsit 28. oktober 1993-imeersoq naapertorlugu soraarnerussutisiaqarsinnaatitaasut kikkuuneri aalajangersakkakkut killiliivigineqarput.

§ 13 - 16-imi aningaasarsiaqartitaanermut inatsit atuuttoq malillugu soraarnerussutisiaqarnissamut piumasaqaatit, aningaasarsiaqartitaanermut inatsit nutaaq malillugu siusinnerusukkut ilaasortaasimasunut inatsisilli atuuttuulerfiani Inatsisartuni imaluunniit Naalakkersuisuni ilaasortaanngitsunut, suli atuuttussat taaneqarput. Piumasaaatit taakku assingi inatsisip atortuulerfiani Inatsisartuni imaluunniit Naalakkersuisuni ilaasortat soraarnerussutisiaannut katersukkanut atuutissapput, tak. § 17, imm. 1.

 

§ 13-imut

Soraarnerussutisiaqarsinnaatitaanissamut tunngavissaatitaavoq pineqartup qinigaaffimmi ataatsimi arlalinniluunniit katillutik sivikinnerpaamik ukiumik ataatsimik sivisussusilinni Naalakkersuisuni Inatsisartuniluunniit ilaasortaasimanissaa aammalu 60-inik ukioqalereersi-manissaa.

Aamma pineqartoq inatsit naapertorlugu aningaasarsiaqarpat ilaasortaajunnaarnersiaqarpal-luunniit soraarnerussutisiaqartitsisoqassanngilaq. Inuk inatsit naapertorlugu soraarnerussutisiaqartoq kingusinnerusukkut Inatsisartunut Naalakkersuisunulluunniit qinigaaguni piffissami aningaasarsiaqarfimmini ilaasortaajunnaarnersiaqarfimminiluunniit soraarnerussutisiaqassan-ngilaq.

 

§ 14-imut

Aalajangersakkami aalajangersarneqarpoq inuk ukiuni 20-ni Inatsisartuni ilaasortaasimappat soraarnerussutisiassai qaffasinnerpaaffissaminniilissasut. Allatut oqaatigalugu Inatsisartuni ilaasortat soraarnerussutisiassaasa naatsorsornerini trinit taamaalillutik 20-upput.

Inatsisartuni ilaasortaasimasut soraarnerussutisiaat tjenestemanditut atorfimmit akissaateqar-fimmi 31-mi skalatrin 44-miittumit soraarninngornermi soraarnerussutisiarineqarsinnaasut qaffasinnerpaaffiisut annertussuseqarput. Aningaasartuutinut matussutissatut tapisiat kiisalu Aningaasaqarnermut Ataatsimiititaliami aamma Kukkunersiuinermut Ataatsimiititaliami ilaasortat kiisalu Inatsisartut siulittaasuata tullersortaasa immikkut aningaasarsiaat soraarnerussu-tisiaqaataasussaanngillat.

 

§ 15-imut

Aalajangersakkami aalajangersarneqarpoq inuk ukiuni 20-ni Inatsisartuni siulittaasuusimappat, Naalakkersuisuni siulittaasuusimappat Naalakkersuisunilu ilaasortaasimappat soraarne-russutisiassai qaffasinnerpaaffissaminniilissasut. Allatut oqaatigalugu Inatsisartut siulittaasuata, Naalakkersuisut siulittaasuata Naalakkersuisunilu ilaasortat soraarnerussutisiassaasa naatsorsornerini trinit taamaalillutik 20-upput.

Inatsisartuni siulittaasuusimasup, Naalakkersuisuni siulittaasuusimasup Naalakkersuisunilu ilaasortaasimasut soraarnerussutisiaat tjenestemanditut atorfimmit akissaateqarfimmi 39-mi skalatrin 52-miittumit soraarninngornermi soraarnerussutisiarineqarsinnaasut qaffasinnerpaaf-fiisut annertussuseqarput.

Aningaasarsiaqartitsinermut inatsit atuuttoq naapertorlugu Inatsisartut siulittaasuat, Naalak-kersuisut siulittaasuat Naalakkersuisunilu ilaasortat nalinginnaasumik tapisianik, inunnut akis-saateqarfiit 35-at tassanngaluunniit qaffasinnerusoq naapertorlugu akissaasersorneqartunut allanut tunniunneqartartunik, pisartagaqartinneqanngillat. Taamaammat tamatuma kingunerisaanik nalinginnaasumik tapisiat soraarnerussutisiaqaataanngillat.

Inatsisartut Siulittaasuannut, Naalakkersuisut Siulittaasuannut Naalakkersuisunilu ilaasortanut soraarnerussutisiatut tunniunneqartartut immikkut isigalugit qaffaavigineqarnissaat siunnersuutikkut matumuuna anguniarneqanngimmat, § 15-imi erseqqisaanissaq pisariaqarpoq; tassalu, tamanut atuuttumik tapisiat, inunnut akissaatit inissisimaffianni 35-imiittunut, taannaluunniit qaangerlugu inissisimasunut tunniunneqartaraluartut, tunniunneqartassanngitsut.

 

§ 16-imut

Aapparisaq qitornallu maleruagassat tjenestemandinut atuuttut naapertorlugit soraarnerussuti-siaqartinneqassapput.

Soraarnerussutisiat nalikinneruleriartornissaat pinaveersimatinniarlugu §-it 14, 15 aamma 16 naapertorlugit soraarnerussutisiat maleruagassat tjenestemandinut atuuttut naapertorlugit iluarsiivigineqartassapput.

Tjenestemandit akissaateqarfinni pineqartuni soraarnerussutisiaasa iluarsiissusertarnerisut ilu-arsiissusiisoqartassaaq.

 

§ 17-imut

Siunnersuummi § 20 malillugu aningaasarsiaqartitaaneq pillugu inatsit maanna atuuttoq tamakkerluni atorunnaarsinneqarpoq. Aningaasarsiaqartitaaneq pillugu inatsit malillugu soraarnerussutisiat qaffasinnerpaaffeqarnerat atorunnaartussaammat pisortanilu allamik atorfeqarnermit aningaasarsianik, akissarsianik imaluunniit soraarnerussutisianik ilanngaasarneq oqinnerulersinneqassammat ikaarsaarnermi maleruagassatigut qulakkeerneqassaaq maleruagassat oqinnerusut taakku Inatsisartuni Naalakkersuisunilu ilaasortaasimallutik tunuareersimasunut atuutissanngitsut.

Soraarnerussutisiat ilanngaatigineqartarnerannut maleruagassat sakkukinnerusut taamaalillutik Inatsisartuni ilaasortanut tamanut, ulloq 1. november 2001-imi Inatsisartuni Naalakkersuisunilu ilaasortaasunut taamaalillutik atuutissapput, taakkununnga ilaallutik Naalakkersuisuni ilaasortat Inatsisartuni ilaasortaanngitsut.

Tamatuma saniatigut maleruagassat oqinnerusut Inatsisartuni Naalakkersuisunilu siusinnerusukkut ilaasortaasimasunut, piffissami kingusinnerusukkut Inatsisartunut Naalakkersuisunullu qinigaasunut, atuutissapput.

 

§ 18-imut

Aalajangersakkami pineqarput Inatsisartuni ilaasortaanngitsut, ataatsimiititaliani, nævnini sin-niisuutitaqarfinnilu Namminersornerusut sinnerlugit qinigaaffimmik ingerlataqartut aningaasarsiaat tapisiaallu.

Piaaraaluni tamanut atuuttussiamik oqaasertaliisoqarpoq. Soorlu inatsit naapertorlugu Inatsi-sartunit Naalakkersuisuinilluunniit pilersitamik ataatsimiititaliaqarsinnaavoq, aammali ataatsi-miititaliaq pineqartoq allaffeqarfikkoortumik pilersinneqarsimasinnaavoq. Kikkorliit ilaasortamik toqqaasimanerat aalajangiisuunngilaq. Aalajangiisuusoq tassaavoq Namminersornerullutik Oqartussat sinnerlugit sinniisuutitaaneq. Tunngavissaatinneqarsinnaavoq / aalajangerne-qarsinnaavoq (assersuutigalugu inatsisit naapertorlugit) pineqartut tassaassasut soqutigisat tunngavigalugit nævnini siunnersuisoqatigiinnilu sinniisuutitaat. Ilaasortat ataasiakkaat immikkut soqutigisanik isumagisaqarnitik pissutigalugit Namminersornerullutik Oqartussat sinnerlugit sinniisuutitaanngitsutut isigineqarnissaat tamatuma kingunerissanngilaa, tassami Namminersornerullutik Oqartussat namminneerpiarlutik soqutigisat taamatut oqimaaqatigiissaarnissaat kissaatigisimassavaat aammalu suliassat Namminersornerullutik Oqartussat sinnerlugit isumannaajarneqartarlutik.

Aalajangersimasumik toqqammaveqartumik naliliinikkut aalajangerneqassaaq ullut qassit qi-nigaaffiup isumagineqarneranut atugassatut isigineqarnersut. Taamaalilluni siunnersuisoqatigiinni nævninilu qinigaanermik isumaginninnermi ullut ataatsimiiffiit saniatigut piareersaanerit piffissarlu angalanermut atorneqartoq ilaatinneqassapput.

Aningaasarsiaqartitsinermut inatsit atuuttoq naapertorlugu nævnini siunnersuisoqatigiinnilu ilaasortat ullormusiaqartitaasarput. Siunnersuutigineqarpoq tassunga taarsiullugu aningaasar-tuutinut matussutissatut tapisiat § 1, imm. 2-mi taaneqartut 1/365-erarterutaannik pissarsisinneqartassasut.

Aningaasarsiaqartitsinermut inatsit atuuttoq naapertorlugu immikkut annertuumik suliassaqar-figisanik siulittaasuuffeqartut immikkut aningaasarsiaqartitaasinnaanerat Aningaasaqarnermut Ataatsimiititaliamit akuersissutigineqaqqaartartussaavoq. Naatsorsuutigineqarmat nalingin-naasumik aningaasaliissutit iluini taamatut aningaasarsiaqartitsisoqartassasoq siunnersuutigineqarpoq Aningaasaqarnermut Ataatsimiititaliap taamatut aningaasarsiaqartitsinissat akuersis-sutigeqqaartariaarutissagai.

 

§ 19-imut

Siunnersuutigineqarpoq Inatsisartut Siulittaasoqarfiat Naalakkersuisut isumaqatiginiareerne-risigut inatsit naapertorlugu maleruagassanik erseqqinnerusunik aalajangersaanissaminut pi-ginnaatinneqassasoq.

Siulittaasoqarfiup angalasarnernut maleruagassanik piaarnerpaamik aalajangersaanissani pilersaarutigaa, aammali aningaasartuutit uppernarsarlugit atsiortarnissat il. il. pillugit maleruagassanik aalajangersaasoqarsinnaavoq. Aamma aalajangersagaq una Inatsisartuni ilaasortat Naalakkersuisunilu ilaasortat soraarnerussutisiaqalernissamut aaqqissuussiviannut (aningaa-saateqarfimmut) soraarnerussutisiassanik akilersiuisarnermut maleruagassanik aalajangersaanissamut periarfissiivoq.

 

§ 20-mut

Siunnersuutigineqarpoq inatsit ulloq 1. november 2001 atortuulissasoq. Taamaattorli siunnersuutigineqarpoq § 3, imm. 4, Inatsisartuni ilaasortap paasisassarsiorluni angalasinnaatitaaneranik imaqartoq aatsaat 1. januar 2002-mi atortuulersinneqassasoq. Aningaasarsiaqartitsinermut inatsit atuuttoq tamakkiisumik atorunnaarsinneqassaaq.